رات اور دن میں بجلی پیدا کرنے والا دنیا کا پہلا سولر پاور پلانٹ:
چین نے دنیا کا پہلا ڈوئل ٹاور سولر تھرمل پاور پلانٹ صوبہ گانسو میں قائم کر کے ایک شاندار تکنیکی کامیابی حاصل کی ہے، جس سے شمسی توانائی کے شعبے میں ایک نئے عہد کا آغاز ہو رہا ہے۔ اس منصوبے کی خاص بات یہ ہے کہ روایتی سولر پینلز کی بجائے، تیس ہزار متحرک آئینے استعمال کیے گئے ہیں، جو سورج کی روشنی کو انتہائی دقت سے دو بڑے ٹاورز پر مرتکز کرتے ہیں۔
ان ٹاورز میں پانی کو بھاپ میں تبدیل کیا جاتا ہے، جو بعد ازاں طاقتور ٹربائنز کو چلاتی ہے اور یوں بجلی پیدا ہوتی ہے۔ لیکن کہانی یہاں ختم نہیں ہوتی—ٹاورز کے ایک حصے میں پگھلا ہوا نمک استعمال کیا گیا ہے، جو ایک دیوہیکل سیوریج بیٹری کا کردار ادا کرتا ہے۔ یہ نمک دن کی روشنی کے دوران جذب شدہ توانائی کو محفوظ رکھتا ہے اور سورج غروب ہونے کے بعد بھی بجلی کی پیداوار جاری رہتی ہے۔
مزید دلچسپ بات یہ ہے کہ یہ آئینے سورج کی حرکت کے ساتھ خود کو ایڈجسٹ کر لیتے ہیں، یوں شمسی توانائی کے ہر لمحے کو قید کر کے اس کا زیادہ سے زیادہ استعمال کیا جاتا ہے۔ یہ پلانٹ نہ صرف تکنیکی لحاظ سے ایک شاہکار ہے بلکہ یہ چین کے توانائی کے میدان میں جدت اور ماحول دوستی کی واضح مثال بھی ہے۔
اس منصوبے کے ذریعے چین نے یہ پیغام دیا ہے کہ شمسی توانائی کی غیر معمولی صلاحیتوں کو نہ صرف مؤثر طریقے سے استعمال کیا جا سکتا ہے، بلکہ اسے رات کے اندھیروں میں بھی روشنی کی صورت میں تبدیل کیا جا سکتا ہے۔ یہ پلانٹ عالمی توانائی کی صنعت کے لیے ایک انقلابی قدم ہے اور مستقبل کی توانائی کی ضروریات کو پورا کرنے کے لیے ایک مضبوط بنیاد فراہم کرتا ہے۔
